Fevralın 4-də Birləşmiş Ərəb Əmirliklərinin paytaxtı Əbu-Dabi şəhərində beynəlxalq nüfuzlu humanitar təşəbbüslərdən biri hesab olunan “Zayed İnsan Qardaşlığı Mükafatı”nın təqdimolunma mərasimi keçirilib. Dünyanın müxtəlif ölkələrindən dövlət və hökumət rəsmilərinin, dini liderlərin, ictimai xadimlərin iştirak etdiyi mərasimdə Azərbaycan Respublikasının Prezidenti İlham Əliyev də iştirak edib və mükafata layiq görülməsi münasibətilə çıxış edib.
Prezident İlham Əliyev çıxışının əvvəlində bu ali mükafata görə münsiflər heyətinə təşəkkürünü bildirərək qeyd edib:
“Birləşmiş Ərəb Əmirliklərinin banisi, mərhum Şeyx Zayedin adını daşıyan bu mükafata layiq görülmək mənim üçün böyük şərəfdir.”
Dövlət başçısı Şeyx Zayed bin Sultan Al Nəhyanın tarixi rolunu xüsusi vurğulayaraq onun uzaqgörən siyasəti, humanist dəyərlərə sadiqliyi və inkişaf strategiyası nəticəsində Birləşmiş Ərəb Əmirliklərinin qısa müddətdə böyük tərəqqi yolu keçdiyini diqqətə çatdırıb. Bildirilib ki, bu gün BƏƏ yalnız iqtisadi uğurları ilə deyil, həm də multikulturalizm, tolerantlıq və sivilizasiyalararası dialoqu təşviq edən nümunəvi dövlət kimi tanınır.
Prezident İlham Əliyev hazırkı dövlət başçısı Şeyx Məhəmməd bin Zayed Al Nəhyanın fəaliyyətinə də yüksək qiymət verərək onun atasının siyasi kursunu uğurla davam etdirdiyini, ölkənin davamlı modernləşmə və innovasiya yolunda inamla irəlilədiyini qeyd edib. Vurğulanıb ki, BƏƏ-nin əldə etdiyi nailiyyətlər sülh, sabitlik və strateji baxışın vəhdətinin bariz nümunəsidir.
Çıxışda dinlərarası və mədəniyyətlərarası dialoq məsələləri də geniş yer alıb. Prezident Əl-Əzhərin böyük imamı doktor Əhməd Əl-Tayyibin və Roma Papasının qlobal miqyasda qarşılıqlı anlaşmanın təşviqinə verdiyi töhfələri yüksək qiymətləndirib. Onların təşəbbüslərinin insan qardaşlığı ideyasının möhkəmlənməsinə xidmət etdiyi bildirilib.
Dövlət başçısı çıxışında Cənubi Qafqaz regionunda yaranmış yeni geosiyasi reallıqlara da toxunub. Azərbaycan və Ermənistan arasında münasibətlərin müharibə mərhələsindən sülh mərhələsinə keçdiyini qeyd edən Prezident bildirib:
“Biz 30 ildən artıq müddətdə müharibə şəraitində olmuşuq. İndi isə artıq altı aydır ki, sülh şəraitində yaşayırıq.”
Qeyd olunub ki, bu dövr ərzində tərəflər arasında etimadın formalaşdırılması, praktiki əməkdaşlıq mexanizmlərinin yaradılması və kommunikasiyaların açılması istiqamətində mühüm addımlar atılıb. Xüsusilə nəqliyyat-logistika sahəsində məhdudiyyətlərin aradan qaldırılması, enerji əməkdaşlığının başlanması və ticarət əlaqələrinin genişləndirilməsi sülh prosesinin real nəticələri kimi dəyərləndirilib.
Prezident İlham Əliyev Vaşinqtonda keçirilmiş üçtərəfli Zirvə Görüşünün əhəmiyyətini də xüsusi qeyd edib. Bildirilib ki, həmin görüş sülh sazişinin paraflanması və Birgə Bəyannamənin imzalanması ilə nəticələnərək uzun illər davam edən münaqişənin siyasi həlli istiqamətində həlledici mərhələ təşkil edib.
Dövlət başçısı Azərbaycan-Ermənistan münasibətlərində əldə olunan irəliləyişin beynəlxalq əhəmiyyət daşıdığını vurğulayaraq deyib:
“Uzunmüddətli münaqişəyə, əzablara və qarşılıqlı etimadsızlığa baxmayaraq, sülh mümkündür.”
Onun sözlərinə görə, güclü siyasi iradə, qarşılıqlı öhdəliklər və beynəlxalq tərəfdaşların dəstəyi sülhün dayanıqlı olmasını təmin edən əsas amillərdir. Bu modelin digər münaqişə bölgələri üçün də praktiki nümunə kimi çıxış edə biləcəyi diqqətə çatdırılıb.
Çıxışının sonunda Prezident İlham Əliyev mərasimin keçirildiyi məkanın rəmzi əhəmiyyət daşıdığını vurğulayıb. Cənab Prezident xatırladıb ki, Azərbaycan və Ermənistan arasında son danışıqlar raundlarından biri məhz Əbu-Dabidə baş tutub və yekun razılıq burada əldə olunaraq sonradan Vaşinqtonda rəsmiləşdirilib.
Dövlət başçısı mükafatı Azərbaycan tərəfindən aparılan sülh gündəliyinə verilən yüksək beynəlxalq qiymət kimi dəyərləndirib, tədbirin təşkilatçılarına, münsiflər heyətinə və sülh prosesinə töhfə verən bütün tərəflərə təşəkkürünü bildirib.
Beləliklə, Əbu-Dabidə keçirilən təqdimat mərasimi yalnız mükafatlandırma tədbiri kimi deyil, həm də qlobal həmrəylik, dinlərarası dialoq və regional sülh təşəbbüslərinin təşviq olunduğu mühüm beynəlxalq platforma kimi yadda qalıb.
