Şamaxı Rayon İcra Hakimiyyəti başçısı Tahir Məmmədov rayonun Quşçu və Laləzar kənd sakinləri ilə növbəti səyyar qəbullar keçirib.

Şamaxı Rayon İcra Hakimiyyəti başçısı Tahir Məmmədov tərəfindən rayonun müxtəlif kəndlərində keçirilən səyyar qəbullar yerli sakinlərin problemlərinin yerində öyrənilməsi və onların həlli istiqamətində mühüm əhəmiyyət daşıyır. Bu istiqamətdə növbəti görüşlər rayonun Quşçu və Laləzar kəndlərində təşkil olunub.

Quşçu kəndində keçirilən səyyar qəbulda rayon icra hakimiyyətinin başçısı ilə yanaşı təhsil, səhiyyə, mədəniyyət sahələrinin və müxtəlif xidmət təşkilatlarının rəhbər işçiləri iştirak ediblər. Görüşdə kənd sakinləri də fəal iştirak edərək onları narahat edən məsələləri birbaşa rayon rəhbərliyinə çatdırmaq imkanı əldə ediblər.

Rayon İcra Hakimiyyəti başçısı Tahir Məmmədov çıxışında son illər ölkədə, o cümlədən Şamaxı rayonunda həyata keçirilən genişmiqyaslı quruculuq və abadlıq işlərindən bəhs edib. Bildirilib ki, kənd və qəsəbələrdə infrastruktur layihələrinin icrası, əhalinin sosial rifahının yaxşılaşdırılması və yaşayış şəraitinin daha da yüksəldilməsi dövlət siyasətinin əsas istiqamətlərindən biridir.

Qəbul zamanı Quşçu kənd sakinləri tərəfindən əsasən su təminatı ilə bağlı mövcud problemlər və kənddə məscidin inşası məsələsi gündəmə gətirilib. Sakinlər tərəfindən səsləndirilən digər suallar da diqqətlə dinlənilib, mövcud problemlərin həlli yolları müzakirə olunub. İcra hakimiyyətinin başçısı qaldırılan məsələlərin operativ şəkildə araşdırılması və həlli üçün aidiyyəti qurumların rəhbərlərinə müvafiq tapşırıqlar verib.

laləzar kəndi

Rayon rəhbərinin növbəti səyyar qəbulu Laləzar kəndində keçirilib. Bu görüşdə də müxtəlif sahələrin məsul şəxsləri və kənd sakinləri iştirak ediblər. Laləzar kəndində keçirilən görüş zamanı sakinlər kənddə yol nişanlarının quraşdırılması və elektrik enerjisi infrastrukturunun yenilənməsi ilə bağlı məsələləri diqqətə çatdırıblar.

Sakinlərin qaldırdıqları problemlər ətrafında geniş müzakirələr aparılıb və onların həlli istiqamətində lazımi tədbirlərin görülməsi üçün aidiyyəti qurumlara tapşırıqlar verilib. Qeyd olunub ki, bu cür səyyar qəbulların keçirilməsi vətəndaş müraciətlərinin operativ həlli, dövlət qurumları ilə vətəndaşlar arasında əlaqələrin daha da möhkəmləndirilməsi baxımından böyük əhəmiyyət daşıyır.

Səyyar qəbulların davam etdirilməsi gələcəkdə də rayon sakinlərinin sosial problemlərinin yerində araşdırılması və onların həlli istiqamətində mühüm rol oynayacaq.