Müasir dövr yeni çağırışlarla yanaşı, yeni imkanlar da yaradır. Bu çağırış və imkanların bir nöqtədə qovuşduğu məkanlardan biri də informasiya mühitidir. Xüsusilə də dini dəyərlərin təqdimatı, qorunması və cəmiyyətə doğru çatdırılması baxımından media ilə dinin əlaqəsi bu gün strateji əhəmiyyət daşıyır.
Məhz bu reallıq fonunda 15 iyul 2025-ci il tarixində Şamaxıda “Müasir informasiya məkanı və dini etiqad azadlığı” mövzusunda təşkil edilən konfrans təkcə aktual bir tədbir deyil, həm də mənəvi-sosial münasibətlərə verilmiş ciddi strateji cavab idi.
Konfrans Dini Qurumlarla İş üzrə Dövlət Komitəsi və Medianın İnkişafı Agentliyinin birgə təşkilatçılığı ilə baş tutdu. Əvvəlcə tədbir iştirakçıları Ümummilli Lider Heydər Əliyevin abidəsini ziyarət edərək, onun tarixi irsinə ehtiramlarını bildirdilər.
Şamaxının simasında milli irs və dini miras
Tədbirin açılışında çıxış edən Şamaxı Rayon İcra Hakimiyyətinin başçısı Tahir Məmmədov, Prezident İlham Əliyevin və Birinci vitse-prezident Mehriban xanım Əliyevanın rəhbərliyi ilə Şamaxının hərtərəfli inkişaf etdiyini qeyd etdi. Rayon ərazisində ziyarətgahların, tarixi-dini abidələrin bərpası, dini-mədəni irsin yaşadılması, tolerantlıq mühitinin qorunması bu siyasətin əyani nümunəsidir.
Ramin Məmmədov: “Media ilə dinin sinerjisi mənəvi sabitliyin açarıdır”
Konfransda çıxış edən Dini Qurumlarla İş üzrə Dövlət Komitəsinin sədri Ramin Məmmədov, informasiya məkanında dini mövzuların manipulyasiyaya açıq olduğunu vurğuladı. Onun fikrincə, müasir texnologiyalar – xüsusilə süni intellekt və rəqəmsal platformalar – həm fürsətlər, həm də ciddi risklər doğurur. Dinin dəyər kimi təqdimatı getdikcə daha çox medianın məsuliyyətinə çevrilir.
Sədrin fikirləri bir həqiqəti daha da qabartdı: media təkcə informasiya daşıyıcısı deyil, həm də mənəviyyatın keşikçisinə çevrilmək potensialına malikdir.
Rəşad Məcid: “Jurnalist dini dəyərlərə maarifçi kimi yanaşmalıdır”
Mətbuat Şurasının sədri Rəşad Məcid isə çıxışında jurnalistlərin dini mövzularda savadlı və məsuliyyətli fəaliyyət göstərməli olduqlarını vurğuladı. Azərbaycanın mətbu ənənəsinin cəhalətə, xurafata və dini istismara qarşı yönəldiyini xatırladaraq, bu xəttin bu gün də davam etdirilməsinin vacibliyini qeyd etdi.
Tamam Cəfərova: “Zəfər dövrü yeni ideoloji hədəflər doğurur”
Millət vəkili Tamam Cəfərova çıxışında Azərbaycan mediasının 150 illik tarixini xatırladaraq, informasiya müharibəsində jurnalistlərin rolunu yüksək qiymətləndirdi. Onun fikrincə, post-Zəfər dövründə dini sahədə yeni təhdidlər yarandığından, media bu boşluğu yalnız obyektivlik və peşəkarlıqla doldura bilər.
Vüqar Əliyev: “Dini informasiya səhvləri ictimai şüura zərbə vurur”
AZƏRTAC-ın İdarə Heyətinin sədri Vüqar Əliyev informasiya təhlükəsizliyi kontekstində dini informasiyaların məsuliyyətli təqdimatına diqqət çəkdi. Sosial medianın artan təsiri və təhrif olunmuş dini çağırışların yayılması cəmiyyətin inanc sisteminə təsirsiz ötüşmür.
Panel sessiyaları və təşəkkürnamələr
Konfrans “Din-media münasibətləri: yeni hədəf və çağırışlar” və “Dini etiqadın sərbəst ifadəsi və söz azadlığı” adlı panel sessiyaları ilə davam etdi. Sessiyalarda din və medianın vəhdəti, dini informasiyanın tənzimlənməsi və ictimai rəyə təsiri mövzuları geniş müzakirə edildi.
Sonda Komitə sədri Ramin Məmmədov tədbir iştirakçılarına və media nümayəndələrinə göstərdikləri fəallığa və dövlət-din münasibətlərinin obyektiv işıqlandırılmasına görə təşəkkür etdi. Media nümayəndələrinə təşəkkürnamələr təqdim olundu.
Qeyd edək ki, konfrans çərçivəsində iyulun 16-da iştirakçılar üçün Şamaxının dini abidələrinə media-tur təşkil olunacaq.
