Vətən torpağında göyərən şair 650 min ağac əkək: Şamaxıda Nəsiminin təsvirini canlandıran kiçik meşə salınacaq

...İnsan yaranışından üzü bəri yol gələn söz karvanı. Neçə ki, bəşər övladı var, bu karvan yolundan qalmayacaq, sirləri özü ilə daşıyacaq. Bəşər övladısansa bu "gəlimli-gedimli" dünyada ən çox qalan söz olacaq.
Bu səbəbdəndir ki, böyük söz ustadı Seyid İmaməddin Nəsiminin həyatı bir insan ömrünü aşıb, əsrlərə yoldaş oldu. İnsan oğlunu mənəvi kamilliyə səsləyən, bəyana sığmayan böyük şairin böyük sözü onu ucaltdl, bu günə çatdırdı.

Mütəxəssislər Nəsimi poeziyasını İnsanın qüdrəti haqqında himnə bənzədirlər.

Azərbaycan Respublikasının Birinci vitse-prezidenti Mehriban Əliyevanın "Bir gündə 650 min ağac əkək" təşəbbüsü dahi söz ustadına ehtiramın daha bir ifadəsi oldu. O, mütəfəkkir şair Seyid İmadəddin Nəsiminin 650 illik yubileyi münasibətilə həyata keçiriləcək aksiya, həm də kökü bu torpağa bağlı olan Nəsiminin əbədiyaşar poeziyasını Vətənin köksündə göyərən, ətraf aləmə saflıq, könül oxşayan gözəllik bəxş edən təbiət incisinə bənzərlik ifadəsini özündə əks etdirir.
Mehriban xanım Əliyevanın bu nəcib təşəbbüsünün sədası Şamaxıya çatanda rayon sakinlərinin sevinci köksünə sığmadı. Elə həmin gündən hazırlıq işlərinə başlanıldı. Rayon sakinləri təbiətimizə gözəllik gətirəcək ağacəkmə kampaniyasını böyük səbirsizliklə gözləyirlər.
Ərazilərin birində dahi sənətkar Nəsiminin təsvirini canlandıran kiçik meşənin də salınması nəzərdə tutulub. Bu məqsədlə rayona dizayner də dəvət olunub. "Bir gündə 650 min ağac əkilməsi" təşəbbüsü noyabr ayında reallaşdırılacaq. Bu, dahi şairin irsinin təbliği ilə bərabər, həm də ətraf mühitin mühafizəsinin vacibliyini insanların, xüsusilə gənc nəslin diqqətinə çatdırmaq, ekoloji problemlərin həllində birgə fəaliyyət göstərməəy çağırışdır.

...Nəsimi insanları kamilliyə səsləyirdi. Bu yol Nəsimi poeziyasının dərkindən keçir. Yoxsa, o, həqiqət işığına qovuşa bilməz:
Heç kimsə Nəsimi sözünü kəşf edə bilməz,
Bu, quş dilidir,bunu Süleyman bilir ancaq.

Könül Məmmədova
“Şirvan”.az